Novas
Morra o conto (TVG) - Rianxeira Vs. Muiñeira de Chantada
10 de xaneiro de 2025
Rubén Troitiño será un dos protagonistas do programa “Morra o conto”, que a Televisión de Galicia emitirá este domingo, 12 de xaneiro sobre as 22:30h.
A gravación deste episodio realizouse o pasado 15 de novembro no Ecohotel Nós, en Silleda. O programa, presentado por Alba Mancebo e David Vilares, propón unha confrontación simbólica entre dous tópicos culturais de Galicia, sempre en clave de humor e co obxectivo de fomentar a irmandade entre ambas posturas. Neste capítulo, o debate xira arredor de dúas pezas musicais moi coñecidas: a Muiñeira de Chantada e a Rianxeira, consideradas polos participantes como representantes da identidade musical galega.
Rubén Troitiño aportará información sobre a primeira gravación sonora da Muiñeira de Chantada, realizada por Avelino Cachafeiro e os gaiteiros de Soutelo de Montes, así como sobre as múltiples versións que se fixeron desta peza, dende as interpretacións de Carlos Núñez, The Chieftains e Susana Seivane ata a adaptación máis recente de Kike Varela, que acadou máis dun millón de reproducións.
Andrés, Rubén e Kike Varela xunto a un dos discos orixinais da Muiñeira de Chantada
O programa tamén recollerá os argumentos do equipo defensor da Rianxeira, que destaca a súa popularidade e o feito de contar cunha letra que a fixo coñecida máis alá das fronteiras galegas.