Novas

Teño a gran alegría de anunciar o lanzamento dun novo proxecto chamado Aí ven Avelino!, unha homenaxe a Avelino Cachafeiro no centenario do seu nomeamento como mellor gaiteiro de Galicia en 1924. Este proxecto é parte das actividades de Músicas da Terra de Montes e busca celebrar a vida e a música deste ilustre gaiteiro.

Aí ven Avelino! é unha iniciativa que invita a músicos e amantes da música tradicional galega a participar e render tributo a Avelino Cachafeiro. O proxecto está aberto a diversas formas de participación, desde formacións de cuartetos tradicionais ata interpretacións solistas.

Modalidades de participación

Gustaríame que todos teñades a oportunidade de participar nesta homenaxe de varias formas:

• Formación de cuarteto: Deberá ser de dúas gaitas, tambor e bombo, cando o repertorio que se queira gravar sexa o que os gaiteiros de Soutelo gravaron en cuarteto. O cuarteto debe levar un nome.

• Participación con pandeiro: Poderase incluír neste cuarteto outra quinta persoa tocando o pandeiro, en homenaxe a Andresa do Outeiro, tocadora de pandeiro que participou con eles.

• Parella de baile: A participación pode incluír unha parella de baile, para engadir un elemento visual ás actuacións, enriquecendo así a homenaxe ao repertorio dos gaiteiros de Soutelo xa que eles, ás veces, levaban unha parella de adultos e incluso unha de nenos.

• Pezas solistas: Tamén se poderá gravar unha peza de solista, con ou sen acompañamento de percusión.

• Repertorio: As pezas do repertorio son as seguintes: "Foliada de Barro de Arén", "La Alfonsina", "Eicho de dar queridiña", "A volta da festa", "Estróupeles-Tróupele", "Rianxeira. Foliada Rías Baixas", "Fandango de Pontevedra", "Muiñeira de Chantada", "Foliada de Luxán", "Farruquiña, chaman á porta", "Foliada de Tenorio" ou "Alborada de Rosalía de Castro".

• Confirmación de participación: Para poder participar, hai que confirmar no correo electrónico musicasdaterrademontes@gmail.com.

• Publicación dos vídeos: Todos os vídeos estarán colgados na propia páxina web do proxecto, así como na páxina de YouTube do mesmo.

Aí ven Avelino! é unha ocasión especial para celebrarmos xuntos a música tradicional galega e render tributo a un dos máis grandes gaiteiros da nosa terra. Esperamos contar coa vosa participación e que esta homenaxe sexa un éxito rotundo. Que vivan as nosas músicas!