Novas

O legado cultural de Avelino Cachafeiro, o Gaiteiro de Soutelo, segue medrando coa recente incorporación de catro cartas escritas por Ramón Otero Pedrayo ao fondo documental das Músicas da Terra de Montes. Estes documentos, agora dispoñibles para consulta na web do proxecto, revelan a estreita relación entre dúas figuras fundamentais da cultura galega. 

Avelino Cachafeiro mantivo unha forte conexión con algúns dos grandes intelectuais do galeguismo. Ademais da súa coñecida relación con Castelao, tamén compartiu unha grande amizade con Otero Pedrayo. Foi precisamente Otero Pedrayo quen animou a Cachafeiro a seguir escribindo poesía tras o accidente que sufriu en 1960, un episodio que levou ao gaiteiro a publicar Voando cas aas da vida, coa portada de Urbano Lugrís e un prólogo do propio intelectual ourensán. 

As cartas agora dispoñibles permiten afondar nesta relación e na importancia que ambos atribuían á defensa da identidade e tradición galega. O fondo documental das Músicas da Terra de Montes continúa así enriquecéndose con materiais históricos de grande valor, poñendo ao alcance do público documentos inéditos sobre a historia musical e cultural de Galicia.

Para consultar as cartas e máis información sobre este legado, pódese acceder á web do proxecto.