Gustaríache colaborar neste proxecto?

2021 - 2026 | 5º ANIVERSARIO
Músicas da Terra de Montes

Músicas da Terra de Montes é un proxecto creado polo músico Rubén Troitiño adicado á conservación, estudo e difusión das músicas da comarca da Terra de Montes.

A historia do proxecto

A historia de Músicas da Terra de Montes comeza en 2005, cando Rubén Troitiño iniciou a recollida dos nomes dos músicos que, nos anos pasados, tocaban a gaita na comarca. A idea inicial era crear unha lista para publicala no portal web da Asociación Cultural Os Abrentes de Cerdedo. Co paso do tempo, a información foi medrando e o proxecto ampliándose, aínda que durante uns anos quedou en pausa, até que en 2015 se retomou con novo impulso.

O confinamento de 2020 proporcionou o tempo necesario para que aquela primeira listaxe se transformase nunha investigación máis profunda sobre a vida e a historia das músicas da Terra de Montes. A memoria colectiva tiña case esquecida a presenza de moitos músicos do antigo concello de Cerdedo e Forcarei, entre eles gaiteiros, pandeireteiras, bandas de música e outros artesáns. Este proceso de recuperación incluíu tamén a recompilación de material físico, como instrumentos e fotografías, que achegan unha visión máis directa e tanxíbel da realidade destes músicos.

Un dos principais obxectivos do proxecto é deixar constancia da gran cantidade de gaiteiros, acordeonistas, pandeireteiras, percusionistas e músicos de banda que houbo nesta comarca. Grazas á memoria dos nosos maiores, recuperouse unha parte fundamental da nosa historia musical, unha tradición transmitida de xeración en xeración e mantida viva até os nosos días. A colaboración desinteresada de persoas e entidades foi esencial para a investigación e a creación de contidos, e dende aquí expresamos o noso máis sincero agradecemento.

Todo este traballo cristalizou coa estrea da páxina web de Músicas da Terra de Montes no ano 2021, concibida como un espazo aberto para preservar, difundir e compartir este patrimonio musical.

O proxecto

Músicas da Terra de Montes nace co propósito de preservar e dar valor ás expresións culturais transmitidas oralmente durante xeracións. Este patrimonio, que se perde pouco a pouco co paso do tempo, merece ser gardado e respectado. Queremos recoller testemuños, repertorios e biografías das persoas que viviron para a música e construír así un arquivo vivo que sirva de referencia para o futuro. Traballamos con coidado e dedicación para que cada historia e cada melodía queden rexistradas e sigan sendo fonte de inspiración.

Dentro deste marco, o arquivo virtual das músicas da Terra de Montes presenta un percorrido pola historia musical desta zona, incluíndo as pandeireteiras, gaiteiros, bandas de música e pequenas orquestras que animaban as festas e romerías, mantendo a música viva durante moitos anos. A maioría destes músicos non foron figuras de renome nacional, pero foron profundamente populares nas súas comunidades, deixando un gran legado cultural que agora podemos estudar e preservar. Actualmente, o arquivo conta con máis de 350 artigos e segue en constante renovación coas últimas investigacións e novidades.

Colabora co proxecto

Músicas da Terra de Montes está aberto á participación de toda a comunidade. Se tes fotografías, gravacións ou algún outro tipo de material relacionado co patrimonio musical da comarca, invitámoste a compartirllo. A túa colaboración axudará a manter viva esta rica tradición e a asegurar que non se perda no tempo.

COLABORA

Toda a información compartida está en constante renovación coas últimas investigacións e novidades.

Este proxecto é totalmente altruísta e de libre consulta.

Uso responsable dos contidos da web

Na web das Músicas da Terra de Montes atoparás contidos de diferentes orixes: algúns creados polo propio proxecto e outros cedidos por persoas colaboradoras. Sempre indicamos quen nos cedeu cada material.

É moi importante respectar isto: o material que compartimos é parte da nosa cultura e da memoria musical da Terra de Montes. Fagamos un uso responsable:

Indica a fonte: Menciona que o contido procede de Músicas da Terra de Montes.
Respecta a autoría: Se foi cedido por unha persoa colaboradora, menciona tamén quen o cedeu (tal como aparece na web).
Contacta se é necesario: Para usos comerciais ou publicacións fóra da web, contacta connosco antes de usar o material.
Comparte con coidado: Axuda a difundir o proxecto mantendo a información sobre a súa orixe.

Grazas por respectar o traballo de todas as persoas que fan posible este proxecto e por contribuír a preservar e difundir a nosa cultura de maneira responsable.